Surat cinta Minoh versi kelate

Assalamualaikum.

Ke hadape abe ja palo butuk anok muloh berhehim pok dogo.

Sayo minoh anoknyo aji setopa hok duk lek jatuh tepi ghumohnyo selamoh rhambut rheseng weiy. Minoh nok royak sikit tok banyok pun, minoh suko dooh ko abe ja jak dulu pah loni. Minoh harak abe ja tak dok sapo-sapo lagi lah hok duk dale ati abe ja. Minoh bilo kelih ko abe ja gak sero po nok nopak ting-ting nya mari angin kus kus gapo ore putih kato fall fall alo payoh nok sebuk eh. Sene kiro mudoh baso gak sero suko po nok nok jah ko abe ja. Ha gitu la.

Abe ja doh la semak jetak ado jangguk sejepuk pahtu paling minoh suko abe ja berehi buak mulok mucung itik po bulih sipo kalu abe ja ngaju. Ihiks. Denge ketinggie abe ja hak rendoh sikik dari pokok nyo mantak pahtu keno pulok denge wano kulik abe ja po buoh sawo nilo tu buakkea minoh terduduk menung berange sore-sore tepi nelo rumoh sokmo-sokmo. Kalula abe ja bulih jadi tok laki minoh oh minoh sero dunio ni minoh nga abe ja jah ado. Bibir meroh-meroh po woh delimo masok tu bukti abe ja ni tok isak rokok. Hokni paling minoh suko sebak minoh tok suko ore isak rokok ni. Sebak tu walaupun abe ja kijo kapong naik pokok nyor, nyauk ike barhuh, sisik lidi nyor jua keliling kapong, nane lado cengek wak samba tapi abe ja mampu hiduk sene tok papo pedano sebak panda jimak cermak.

Minoh kelih abe ja ni baik sungguh dok nipu sikit habuk nah. Abe ja berehi nulong ore-ore kapong kito hok dale darurak. Kalu ado ore kapong susoh gak abe ja hok sungguh sekali hungga gi sapa selok kain-kain minoh kelih. Nya hungga tu gak kaloh usin bok. Tapi tak po minoh suko kelih abe ja sungguh gitu bia napok betih bulu bulih ikak pung.

Minoh harak abe ja sudi terimo minoh sebagai isteri abe ja. Kalu abe ja tok sey nikoh lagi pung tak po la kito sain-sain jah dulu. Gapo ore kato kena hati masing-masing. Minoh tok kisoh pung kalu abe ja napok minoh mace perigi cari gayong sebak minoh meme suko dooh ko abe ja. Jame loni tok jadi hal kalu tino lamar jate sebab jame dah beruboh. Heee.
Nati abe ja pikir semula deh terimo minoh ko dok. Minoh harak sangat ko abe tu. Harak kito bulih duk nengung samo-samo tepi nelo bila hari tuo kito nanti. Cia cia.
Tak po la abe ja. Setakat ni jah surak minoh.

Pecah kaca pecah gelas.
Bilo baco harak balas deh abe ja.
Assalamualaikum

Yang benar: Minoh sanggol sengek